حياتي في اوراق !!!!

[موج البحر]

بداية حياتي من البدايه الى الان حياة شقيه بما تعنيه الكلمه .....فكرة القسم حلوه ...

من ولادتي الى شقاوتي ولاعب والدراسه والكوره والغزل والحب والعذاب والسفر والتعب ومحبتي للقراءه والى رحيلي عن اهلي الى الرياض والى الخبر وتكميل الدراسه والوظيفه واستقراري في الرياض .

ولدت في مدينة حائل عروس الشمال مدينة الكرم ,,
طبعا متذكر شي في الطفولة الا الصياح والبكاء اخر الليل ..

الى الابتدائيه ومرحلة الطيش وكل همنا اننا نضحك ونلعب الى السباحه في بركة مزرعتنا الصغيره الى سرقة سيكل الخباز الي بالحاره ( كنا نسميه سمعه) يشبه سمعه الي في مسلسل ابو عواد .

فاصله حياة ( من المواقف كان فيه مدرس يدرسنا مواد دينيه وكان كثير ميكرر كلمة الايه والايه والايه بعد كل جمله يقول ايه ايه . وفي حصته اتخذت قرار خطير جدا في وقتها اني اعد(احسب) كلمة ايه الي يقولها المدرس كل ايه يقولها في الشرح اخط خط في ورقه ..الفكره نجحت بس مكملت لان الاستاذ انتبه لي وقال وش تسوي وعطاني ذاك الكف الي للحين اتذكره وطردني من الفصل.

تكملة الحياة

اتذكر بعد صلاة المغرب وانا كنت صغير الشيبان يجتمعون عندنا يعني بعد كل صلاة مغرب يجتمعون شيبان الحاره
كانوا يسمونها اهل حائل(شبه) سوالف وكنت اسمع لهم وصب القهوه والشاي وحب احفظ من اشعارهم وقصصهم كانت حلوه ومشوقه وقصص غزلهم نصابين كلهم ههههههههههههه كل واحد كنه قيس وهو يمكن مشاف مراه الا زوجته. بس كانت حلوه مره سوالفهم وفيها حكم وخبره وحياة.

راح اشوف الردود وكمل لكم باقي الشعبطه والشوشره

[موج البحر]

اعود اليكم

وفي المرحلة الابتدائيه كان ساكن معنا في نفس البيت عمي هو وزوجته واولاده يعني عائله مترابطه مع بعض بس عمي عصبي مره وابوي الله يرحمه انسان محبوب ومسالم ولا يهاوش احد ابدا ينصح يقول هذا غلط . بس عمي ياربي ياستر
كنت انا مهبل فيه وكان هو ميقصر ضرب وهواش وطردي في الاحواش .
وفي يوم من الايام الي مراح انساها كان عمي قبل المغرب بشوي منسدح في الحوش نايم في الهواء العليل وكنت انا اطل عليه
من البلكونه من فوق بيتنا ايام البلكونات المهم انا حاقد عليه رحت جبت لي طشت (سطل كبير مره) ومليته فل ماء وانا كان عمري وقتها 11 سنه وسحبت الطشت الى البلكونه وهو مليان ماء ورفعته بشويش فوق الحديد حق البلكونه واخذت وضع التصويب على عمي وهو نايم ميدري وش السالفه وانا ارمي الطشت كله بالماء على عمي من فوق ويجي عليه ويقوم مثل المجنون ويطالع لي وانا اطالع فيه واضحك ابي اقهره ابيه يشوف انه انا كنا صغار وقتها فينا شيطنه كبيره المهم قام يلعن ويهاوش وراح يبي يطلع للدور الثاني بس انا كنت مقفل الباب الي يدخل على الدور الثاني وكنت واقف في البلكونه قلت اذا كسر الباب وربي لطب من فوق وش اسوي الحياة غاليه وهو ماعنده رحمه.

هذه من موقفي الي مراح انساها ابدا.

التكمله فيما بعد للباقي الحياة الحلوووووووووووووووه ايام الصغر