ارعصش ياماترعصش (( ماتأدرش تغمض عينيك ))

[ღ°° ســهام °°ღ]

كل يوم من نصبح وأقول أبنزل الموضوع اليوم .. الله لا يعقيني بـ شر ..

ويروح اليوم وأقول بكرا إن شاء الله ويصير بكرا وأقول بكرا ويصير بكرا وأقول بكرا >> بالله أحد يجر منه الكيبورد

بس الحمدالله .. تفلت على الشيطان وتعوذت من إبليس وإتكلت على الله وإكبس إعتماد موضوع ولله الحمد والمنه

اود ان ابطح اعجابي بيومياتكم .. والصراحه كثير إنصدمت منهم :bm: عليهم أساليب حرام مغبينها من قبل

كش عليكم

صحيت اليوم بجرّ الكنبل مني >> لغير الناطقين بالسعوده (( غطاء ))

وأثرها إختي تنافخ .. الا التفال يتناثر علي مثل الواحد لا صار معصب وينفخ وينثر معه تفال تلطيف للجو
الحرمه ماينفهم حكيه .. توني صاحيه ومانيب أستوعب المهم انحلت مسألة هالصراخ وطلعت مع الوالده
غسلت وجهي وفرشت هالإثم الخاايس مدود ونزلت تحت.. الأوضاع نوعا ما ميته هدووء يسبق العاصفه

وجالسه بالصاله متمدده ومعينه من الله خير

البيت فاضي

وأسمع صراااخ جاي من السطح وكالعاده .. الشغالتين متناطحات
قلت لاحووول بالطقاق يحلون مشكلتهم بحالهم كيفهم

الا الصراخ كل ماله يزيد .. مالي خلق

قلت بـ نفسي بما إنك .. ياسهام إنتي أكبرهم بهالبيت حالياً .. قومي وتفلسفي وخلتس الكويسه بينهم
وأقوملكم وأرقى فوق .. الأوضاع متكهربه ولأول مره أشوف شيء مرعب Live وتسبديه وأقوم أدخل عليهم على بالي بيشوفنن أبد وبيتنافضون ويرفعون الرايه البيضاء .. املاً بالإصلاح بينهم

والا الآدميتين ماعبروون .. ويكملونها طقاق ..
فكّ وأفك
راسي وش ثقله ذيك اللحظه .. وأقعد أشفط علشان أصير الشاهده لا جت أمي أقولها كل شين ولحد يتسذب على الثانيه
الزبده جت أمي وتفاهمت معهم ومثل ماقلت لكم انواع التشليخ من الثنتين .. رحمة من ربي صرت الشاهده عليهم
نزلت تحت وإنبطحت على الكنب بالصاله وكنت مرهقه >> من كثر التركيز على حكي الشغالات بس لا يفوتن شين :bm:

كنت أركز بـ ذمه وضمير ..

فقعت ضحك لحظتها ذكرت هوشه حصلت لي أيام ثالث متوسط الله يالدنيا حسيت وش كبري ألحين
هالهوشه الله يسلمكم كنا طالعين لـ ملاهي ستار ستي .. وكان على ماأذكر وقت عيد فا لما تروحون لها بتشوفون وفد سكاني كبير من الدول المقاربه وتعدون بالأصابع السعوده مدري وش مطلعنا ذاك اليوم الزبده إن العالم المتغربه عندنا معيدين .. بهالملاهي .. المهم الأوضاع كانت جامده وفاضيه الملاهي نتمشى أنا وبنات خالتي همن تلفنا العافيه وننبطح على الثيل واشوف ولد خالتي متناشبن مع بنت جرمه لاحول ولا قوة الا بالله وهو الولد وغطته ماشاء الله .. وكانت البنت شقرا عاد أنتم نقوا من وين :bm: المهم وتدزه دز والولد يدزه بالخفيف >> وتسبديه ولدنا بف باستري
وكل مال الاطراف تشد المهم ولدنا طقه وهج >> لازم تغرزون بعيالكم منذ الصغر على المثل اللي يقول .. من طقك إلعن خيروووه



يتبع

[ღ°° ســهام °°ღ]

ولدنا مشا على الوصيه وقفنا عند طقها وهج .. على باله ماراح تلحق عليه بحكم جرمها العريض وسمنتها اللي بالأكيد ماراح تساعدها بالركض .. طلعت البنت لا إله الا الله ..صكتها الصحه ومصتصحه علأخر وجلدت ولدنا مصعته تمصيع لين ماقال الولد فيش فاااااش >> إنقلعي
وانا أشوف الولد .. كل ماله يخضر يصفر يحمر وأقوم لكم طرزان العايله .. وأنا وكانت دخلتي دخله بريئه جدا جدا جدا >> لا والله مشتهيه الهوشه

وأقوم يعنني أبفك .. الا اللي أشوف يدن تجر شعري وتشد شد ابن كلب .. أنا صرت بحاله مأساويه فعلاً

اشوف راسي يتمايل ياما قال يمين ياما قال يسار .. قلت والله ماأخليتس يابنت امتس وأقوم أشد شعره

أشد وتشد

أشد وتشد




وانتم أعرف .. العالم تتجمهر ومحد يفك .. >> بلا ثيران هايجه وش يفكه





والله وربي يشهد علي .. إني سمعت شيء بـ راسه يطق .. ههههههههههههههههههه


أثره الغصله اللي ماسكته أنا إنقلعت .. والبنت تصارخ .. ههههه ولكن مازالت تشد بـ شعري .. قلت ألحين تشد شعري وأنا ماسكه غصلة مقلوووعه ماينفع .. وأقوم لكم وأجر غصلتن ثانيه .. وبالفعل إنقلعت الثانيه >> من حرّ ماأوجس ههههههه

فكونا العالم .. من بعد ماشافوا الشعر متناثر على الأرض والهوا يدربيه هي راحت لأهلها وأنا اعدل بعمري يا من شعر .. يا من ملابس أرتبه .. والعالم تقزن ويحشن وأنا أدقهن بـ نظره أليمه ويتنافضن >> أقول إنزلعي والله ماجابو خبرتس

المهم شوي جت وحده تقول الإداره تبيتس .. وأبق عيوني حسيت صدز إني بـ مدرسه .. وأقوم أقول أصلاً أنا ماأخاف

ويجروونن للإداره .. وأثر البنت جالسه هناك وأشوف زين وأفرك عيوني مرتن ثانيه وأشوف .. الا صدز ذولي تبعها الموقف بالمره لا يحسد عليه .. مثل ماقلت لكم من قبل البنت جرمها ماشاء الله .. يوم جيب للإداره أثر هناك إختين لها وكل واحده ألعن من الثانيه .. جرم طول وعرض .. من جد ذاك اليوم بربصت الدنيا وطرطشتها المهم وتجينن الصيحه وأصيح .. أثر الإداره ولبى قلبها .. واقفتن معنا ..خبركم إحنا بأرضنا .. ولنا أحقيه بالطقاق >> أقول على تبن
المهم حصلت مشاده في الإداره .. وأذكر إن حدا خواتها .. تقول (( لك شوفي ئرعت (( قرعت )) البنت .. وأخبر بلحظتها ردت بنت خالتي وقال عادي زيت الزيتون زين للقرعات )) ههههه .. حسيت إني ودي ألتفت عليها واتفل بعينها .. توشوش السالفه علينا .. الإداره قالوا .. خلاص توكلوا على الله وإحنا نتصرف معهم .. رحت لهلي وأنا ماااش للحين ماإرتحت .. قلت مااش أنا اليوم مضروبه مضروبه قلت لهلي مشينا .. ونفضتهم ولبسنا عبينا .. وانا مقبله لـ بوابه >> وانا متنقبه طبعاً خخخخخ
وأشوف حدا خواته داخله وربي رافعتن كمومه لـ فوق .. وأبد جازمتن إنها تقرعن يووه أتخيل شكلي مقرعه ألحين >> خنقته العبره ..


طلعنا وذيك الليله ويشهد علي ربي ماذقت النوم .. اتخيل أشباههم حولي وأستاحش وأقوم اغمض وتطلع لي ام رفعة كموم


وصرت أستاحش من ستار ستي .. وإن دخلته جسيت نبضه قبل وأشوف الأوضاع تمام همن أفتش >> لعبوا بحسبتس ياعمري


واخيرا




أحب أقول .. إني الله يفشلن من أول ردود لي من اليوميات .. مطاقات عبدن يالعبده

بعد هالضحك .. رحت أرتب شطنتي ورانا سفره بكرا الله يسهل علينا ويردنا سالمين غانمين

كان بالعشا عندنا ضيوف .. والحمدالله إنبسطنا

بعدها دخلت الماسن .. ولقيت هالعله .. غلوووو .. وشيء طبيعي .. تلاقطنا .. طقني وأطقك


وأخيراااا


حررت هاليوميات الساعه 12.23

تصبحون على خير .. وأشوفكم بكرا بإذن الله صباحاً

أختكم :.. سهام >> أم الزحمه

[ღ°° ســهام °°ღ]

(( صراع عنيف ))


اليوم صحيت من النوم وأنا شبه أتنفس

عقب الزكمه أمس .. صار اليوم خشمي غير قابل لـ تنفس .. مزكم زكمه على كيف كيفكم :bm:

وخبري خبركم .. اليوم صيام والريق نااشف .. وحالة يصعب على البني آدمين

بس قلت يابنت إمشي على المثل اللي يقول






لا تحزن


:bm:



وأقوم من النوم >> حياتك كلها نووم

وأشطف وجهي كالعاده وافرش هالسنون الله ياجرن ..

بس بحكم الجو .. بارد ألحين مازلت أُعاني من أزمة الزكمه والصراع العنيف اللي يتكوّن من دوره كامله

لـ شفط والشفيط

احاول أبلع العافيه .. وأنسجم ماااش .. لو إني مو صايمه كانت محلوله >> تبلع >>> أنتي إنسانه بيكسرون لمبتس ويعطونتس ملفتس :bm:

ههههه

ماعلينا .. إني أحاول وأحاول وأحاول

وإممممم

وشو بعد

عيدت على العالم اليوم .. وللحين ماجانا ولا شيء من خرفان عمامي >> عجله وفاهمه الدين بـ رفاله :bm:

وإني أحاول وأحاول وأحاول


وأخيراً .. أحب أستودعكم لـ بعد العيد أمل ان نلتقي بكم >> يـ درر ..

وكل عام وانتم بخير ..

دوووم هالأفراح تدق أبوابكم

فلوووها بعيد .. وقبل لا تذبحووونه

صوروااا خرفانكم .. لأن ولأول مره عيد أضحى يمر علي .. ولا أشوف حالة الخروف قبل وبعد

موفقين .. يا حلوين


وأحلى تحيه لك انت ياللي تقرااا >>


تحيتي

سهام أم الزحمه >>

[ღ°° ســهام °°ღ]

ولله الحمدالله .. والمنه

هبطنا على أرضنا بـ سلام مساء أمس .. فعلاً كانت رحله ممتعه بـ دبي كالعاده


هجولنا

وقزقزنا :bm:

وخربنا وجينا


ماكنّا نتوقع .. البراااد واصل لـهدرجه في الرياض .. طلعنا من المطار ويخمنا هالهواء البااارد

إرهااااق أمس تعشينا وتسدحنا

صحيت اليوم الساعه 12.20
كل العايله متفككه
اللي يشكي ركبته
واللي رجوله

واللي كوعه .. واللي خشمه >> متصلب من كثر البراااد


ماعلينا

اليوم طفش واطفش الأطفشين

دجت على النت لين طحت بـ موضوع .. من جد طلعت به بالأخير الفرق بين البنت والولد
وكيف إن الولد بـ طبيعته جفس جفس جفس :bm:

وجايبه لكم إثبتات مصوره .. من قبل ناااس يفتخر بهم كي تزول الشكوك وتثبت الردود :bm:



البنات وهم يتميلحووون




وهذي ثانيه





بعد هالتميلح


يجيكم ناااس تبي تقلد


وليتهم .. ماقلدووا

جابوا العيد








هههههههههه

قسم بالله تفقعت ضحك وأنا أتأمل بأصابعهم ..

أكثر شخصين عملوا الحركه بـ ذمه وضمير

أبو جينز واللي جنبه المعشش .. من جد حسيتهم تعبوا وهم يسون هالحركه


شدّ عضلي وإلتهاب بالجيوب الأنفيه عقب هالتمطط

الله يسعدهم .. ضحكون لين تمزعت ..


يالله عاد ألحين .. أبطس مع إختي لـ ستي بلازا


لي عوده .. بعد ماأرجع إن صار لي مزاج :bm:

يوم سعيد لكل اللي مروا


سهام

[ღ°° ســهام °°ღ]

السلام عليكم ورحمة الله وبركاته


>>> داخلتن وهي متلحفه وتلقط خشيماتها من الحيا


صدز صايره هاليوميات ماتنكتب الا بين فتره وفتره ..

الشكوى لله

صاير الواحد مع هالبرد منكمش .. :bm: ويالله يتحرك ..



يالله حسن الخاتمه ..

[ღ°° ســهام °°ღ]

صباح الفل والياسمين

صباح برد الشتا

صباح خبر التميس


صباح الجبنه والرغيف

صباح مايحلى الى مع الشاني


---

صدق ياكره الدووواااام مع الشتا

تحس ياثقل دم نومك .. يالله يالله ينفضونك من السرير

تحس ود هالسرير يتصفط وين ماتروح معك

صرت ماانوم الليل .. عشان هالأزمة >> طقاق الصبح

اواصل لـ دوام وعقبها إدبخها نومه .. وصلو علنبي :bm:

مابقى شيء علدوواام ..واليوم عندي محاضره نوعا ما تعجيزيه .. من 8 لـ 1ونص نعنبو الروووس اللي بتستوعب

تنميه فكريه .. >> إعتمد على خيالك بـ تمشي

طيب الروووس المصدّيه مقفله تنتظر الرسوب بالراحه والله يستر

على العموم ماعلينا

الله يمد لنا عماااار لـ وقت الدوام

---
قبل أمس



يوم السبت كنت أذاكر لإمتحان يوم الاحد

جد جد عجزت أستوعب بأن الإمتحانات تلوح بيدها الكريمه .. بأني قادمه

حمت كبدي .. وجدعت الكتاب على جنبك وروحي ضبطي ياسهام لنا الـ FM
حاطه السماعات على إذني .. وإطلقي العنان يـ سهام .. صوت لايلعى عليه .. تكون منسجم مع الإغنيه وتغني معه بـ كل حماس وصراخ

فجاه تشيل السماعات عن إذنك وانت مواصل الغناء


تشوف الطامه بـ صوتك

انواع النشااااز صدق

أبوسع صدري وأبطلق العنان لأبوه لأبو من جابه

جوالي بيدي .. والسماعات بإذني .. ماحسيت الا أنا مخلصه وجدعت الآي بود على الكنب .. وأناظر الجوال

وأبق عيوني .. اثري داقه على السواق اللي يودين للجامعه وأنا فيه حالة غناااااء :bm: منشز

وتنصب علي مويه باااااااااااااارده .. وينكمش جلدي .. وماحسيت إلا والغلقه داقتن

وتسبديه .. لايفهم غلط >> عاد الإتصال كان 10 بالليل

يعني عليك السلالالالام .. يـ سهام





جلست ماحسيت نفسي الا داقه على وحده من صديقاتي .. واهرج عليه لعل وعسى تهون علي ..واسمع ضحكه واصل لـ أقصى قريح

وتدقن الغلقه زووود ..

صار يوم الأحد .. اللي هو يوم الإختبار اللي هو أمس >>> برااااااااااا :bm:

ويدق علي الصبح .. حول 5.30 >> مبكر وتصكن الروووعه
أدق عليه ويقول 10 دقايق وأنا عند الباب

>>>> رحت للحمام الله يكرمكم >> بلاي تصلبت ركااابي


:bm:


لبست عباتي وطلعت

والا الرجل يتميلح .. موقف عند الباب بالضبط >> بالعاده مبعد شوي
وأدخل يالله يالله أشوف ملامح البنات من كثر الظلمه (( 5.40 )) وأهرج عليهم السالوفه .. وخوذوها تلزيق

الله البلشه صدز .. قلت يابنت ماعليتس وواصلي بتشجيع الهلال >> منبسطه على الفيس وحالفتن أحطه :bm:


جيت عند باب الجامعه .. ويحطن عند الباب >> بالعاده عند أقصى قريح



ليتي مغنيه منذ مبطي ..

وصلت الجامعه جغفت بهالبني .. كانت عندنا محاضره غثيثه نوعا ما .. بعدها كان وقت الإمتحان .. طلعت وإمتحنت والحمدالله

حلو وإنبسطت عليه ..

رجعت للبيت دبختها نومه .. ويازين نومة الشتا صدز >>> (( وجه يقز غلووو ))

والسلام خير ختام



>>> الله من كثر هرجتس صدز عيوني تقحص رايحه جايه على هالهذر


يوم سعيد وصباااح أحلى

سهام

[ღ°° ســهام °°ღ]

صبــــــــــــــــاح بشـــع


الساعه 6.00 بالضبط

على مابال ألبس وأتضبط .. الساعه 6.30 >> هو غريبه اخذت نص ساعه بس:bm: بحكم إني بنت جامعيه ماتضبط الا وهي ساعه على المرايا

بس مالي خلق اليوم بس همي أوصل الكليه بأ