يوميات لولي :)

[لؤلؤة المحيط]

السلام عليكم ورحمة الله وبركاته

هذا الموضوع راح يصير يحتوي على يومياتي يعني مو كل يوم راح اكتب بس اذا صار في شي مميز وسبيشل راح اجي واكتبه

طيب
اليوم وامس كان روتيني جدا عشان كذا ماراح اكتب عنهم شي

بس بكتب عن يوم الخميس الي فات (6 ديسمبر 2007) <<<< كان يوم مميز

الساعة 8:30 الصباح دقت الساعة سكرتها ونمت الى الساعة 9:45 قمت مفجوعة
عندي موعد الساعة 10:30 الصبح باقي 45 دقيقة ياربييييييه ايش اسوي

وطيارة تجهزت وامي لما شافت اني متاخرة كذا سوت لي فطور
من العجلة اخذت الفطور معي بالسيارة وقعدت اكل بالسيارة

المهم عدى الموعد على خير

الظهر ماكان في شي عادي دخلت المنتدى والماسنجر سولفت مع العالم وبس

الساعة 2:45 دقيقة قمت اتجهز عشان عندنا رحلة مع مريضات السكري الي اعمارهم مابين 12 الى 20 سنة

لما جهزت وخلصت الساعة 3:30 ركبت السيارة ونزلت امي ببيت خالتي ورحت المكان الي بنتجمع فيه
هالمكان كان في معرض مسوينه بمناسبة اليوم العالمي للسكري كنت ماغير امشي واسلم
كثير اعرفهم

المهم قعدت انتظر وانتظر الين جوا البقية ومعهم المريضات

انا و2 معاي كنا مسؤولات عن المريضات
لفينا فيهم عالمعرض
بعدين اكلنا وجبة خفيفة
وبعدين وهو الاهم لعبنا بولينق

البولينق المفروض المريضات هم الي يلعبون لحالهم بس انا من الحماس قطيت معهم وقعدت العب

المهم المريضات حبوني
وطول الوقت وهم على بالهم اني مريضة منهم وفيهم
هم متعودين على بعض دايما يشوفون بعض بس انا كنت وجه جديد عليهم فحسبوني مريضة جديدة

تتسألون ليش كانوا يحسبوني مريضة ؟؟
اولا لاني كنت العب معهم بولينق ومتحمسة
ثانيا انا عمري 23 بس شكلي يعطي اني 15 سنة

بالاخير سالوني انت مريضة جديدة معنا
قلت لا انا طالبة امتياز واتدرب

انصدموا من جوابي

يوم الخميس كان فلللللللة ونااااااااسة

وهذي يومياتي ليوم الخميس
ولي عودة لو صار في شي مميز بايامي المقبلة باذن الله

[لؤلؤة المحيط]

اول شي شكررررا على تفعيل الموضوع

ثاني شي اليوم بالدوام كان ملئ بالمشاكل

الصباح كانوا طالبين كيكة عشان مسوين حفل وداع لواحد دكتور المهم الكيكة تاخرت ماجت الا باخر الوقت المقرر انه يسوون فيه الحفلة فاختربت السالفة وماسووا لا حفل ولا تكريم
والبنت المسؤولة عن الحفل طوووول الوقت وهي تصيح


المشكلة الثانية
وحدة من الموظفات سمع عنها المدير كلام مو صحيح ناداها وقعد يحقق معها وهي انظلمت ولا قدرت تدافع عن نفسها
وطول الوقت وهي تبكي
جت وحدة وسالت ليش تبكين ؟
انا من باب المزح قلت انها تبكي عشاني عطيتها كف
قامت البنت الي تبكي فجأة وقفت عن البكا وقعدت تضحك وقالت والله ياليت كل الناس زيك يالولي
طبعا انا استحيت وجهي صار طماطم <<< زي هذا بالضبط


المشكلة الثالثة
وحدة مريضة عمرها 19 سنة ضاعت
وكانت جدتها معها وقعدت الجدة تصييييييح وتقول وين بنتي وديتوها
وقعدت اقولها ياخالة دقي على جوالها قالت ماعندي رقمها
المهم بعد البحث لقينا البنت رايحة للحمام
تلفت اعصابنا عالفاضي

وبس يعني اليوم شفت 3 اشخاص يصيحون >>> وش هاليوم الزفت

وبس

[لؤلؤة المحيط]

عدنااااا من جديد مع يوميات اخرى

اليوم زواج ولد عمي

الحين انا جاهزة بس انتظرهم يخلصون ويقولون يلا

العصر رحت سويت شعري وقبل شوي حطيت المكياج
وباقي البس الفستان <<< هذا قبل موعد الروحة بشوي

وبس

اخر شي بقوله

الله يوفقك ياولد عمي ويسعدك مع زوجتك وبحياتك الجديدة

[لؤلؤة المحيط]

السلام عليكم


يوووه من زمااااااان ماكتبت يوميات


اليوم الجمعة
21 ديسمبر

الفجر
سهرنا انا وتوتة عالماسنجر
اخر المحادثة معها انتهت بهوشة
بس الحمدلله عدت على خير وتراضينا


طيب المهم
بعد ماانتهت الهوشة مع توتة رحنا نمنا


الساعة 3 العصر

طق طق طق
^
^
^
صوت قرع الباب

انا صحيت على طول وقلت وش فيكم
قالوا قومي بنروح البر
انا >>>

احد يروح للبر بهالبرد

طبعا وطول الوقت وهم يشتغلون ويستعدون
وانا معترضة

اقول برد احد يروح بالبرد للبر

باخر شي لما شفت ان الكل رايح وطبعا ماينفع اجلس لحالي بالبيت
اضطريت اني اروح
بس على بالي اتغلى
قلت لهم اروح بشرط تعطوني فروة

طيب رحت لبست
بلوزتين وبنطلونين وشرابين
وجزمة <<<< لو ينفع كان خليتها جزمتين
وحطيت شال على راسي
ولبست عبايتي

وساعدتهم بالنهاية على تحميل الاغراض

وركبنا السيارة وبالطريق مرينا على كم محل نشتري بعض الاغراض الناقصة


وصلنا
ولبست فوق كل ملابسي الفروة الي عطوني اياها


وتغدينا
وشوينا ذرة

ولعبت مع اختي الصغيرة كورة


وبعدين
اخوي الا يبي يركب دباب
وحط براسه الا يبي يركب

قام اخذ السيارة مع امي يدورون دبابات

واحنا يالباقين قعدنا


فجاة
الجو انقلب
وعجت علينا

وامي واخوي بالسيارة
واحنا قعدنا ندق عليهم نبيهم يجون عشان نروح
وهم ضيعوا


انا خفت وطاح قلبي
وقعدت اقول ابي امي

وبنفس الوقت خايفة واحس ان الهوا بيطيرني

وبالاخير الحمدلله امي واخوي لقونا وضفينا الاغراض بصعوبة من الهوا

وركبنا السيارة
وتوجهنا للبيت
وانا بالطريق اقولهم
قلت لكم برد بس ماتسمعون الكلام

وبالاخير وصلنا البيت بسلام ولله الحمد

ونزلنا الاغراض من السيارة

والحين انا جالسة اكتب يومياتي

[لؤلؤة المحيط]

اليوم الثلاثاء
25 ديسمبر 2007

امس الساعة 12 بالليل دخلت المنتدى
وقريت يوميات احد الاعضاء

ولقيتها كاتبة

اقتباس بالي جداااااااا مشغوول قلقانه على لولي ماشفتها من امس الله يجيبها بـ السلامه والله لها فقده واذا غابت 5 دقايق فقدتهاااا واين انت غايب جرحت القلب بغيابك

^
^
^
اول ماقريتها دمعت عيوني

وتأثرت مرة

توتة الله يخليها لي
والله من جد حتى انا الحين فاقدتها

وبالاخير اخذت هالجملة

اقتباس واين انت غايب جرحت القلب بغيابك

وحطيتها توبك لي بالماسنجر


طيب والحين توه يبدا يومي لا جديد
ان صار شي مميز جيت وكتبته

والحين اشوفكم على خير مع يوميات ثانية

[لؤلؤة المحيط]

الثلاثاء
25 ديسمبر 2007

الساعة 7:27 مساء حسب التوقيت المحلي لمدينة الرياض

هذي المشاركة الـ5000 لي من يوم دخلت المنتدى

فكرت وفكرت وين احطها

قلت احسن شي يومياتي
لان يومياتي تحتوي على الاشياء المميزة بحياتي
ووصولي لـ 5000 مشاركة يعتبر شي مميز

[لؤلؤة المحيط]

السلاااااااام عليكم

جيت لكم اليوم مع يوميات جديدة
اليوم الثلاثاء 1 يناير 2008

بكتب عن يوم امس الي هو 31 ديسمبر 2007

سبحان الله امس كان 2007 واليوم 2008

يعني نقدر بدال مانقول امس نقول السنة الي فاتت

يعني انا ماشفت امي واخواني من السنة الي فاتت
<<<<< ماشافتهم من امس
تعرفون كلهم مداومين

انا هالاسبوع اجازة ماراح ابدا الا الاسبوع الجاي دوام
اول الاسبوع كنت مبسوطة اني باجازة والناس مداومين

بس امس بديت امل وازهق
وودي اداوم اليوم قبل بكرا

اول مافتحت الماسنجر كتبت بالتوبك
ماخلصت اجازتي الى الحين <<<< مين يبادلني ياخذ الاجازة واداوم بداله :(

جاني عروض كثييييير للمبادلة
الناس تبي الاجازة وانا ابي الدوام
بس والله مو حلو انك تعطل لحالك

المهم
امس قمت الساعة 9 ونص الصبح

اول ماقمت افطرت
وبعدين دخلت المنتدى وكتبت موضوع بلونلي للصحة والرشاقة

وبعدين قعدت ارد على مواضيع
وخلصت منهم ورجعت للطفش
دخلت الالعاب ولقيت استاذ لونلي وعذابي وقمر زايد يلعبون بالبيض
دخلت معهم اول ماشافني لونلي قعد يهدد ويقول ياويلك ترمين علي شي
انا خفت من التهديد وقل بصير بصفك
وحظي امس كان زي الفل اكثر من مرة تطيح بيدي البيضة
وكل مرة ارميها على عذابي او قمر زايد لانهم متسلطين على لونلي
مع انهم صديقاتي بس وش اسوي خفت من تهديدات لونلي


وخلصنا من البيض ورجعنا للملل
دخلت موضوع Top 10 حق الافلام
ومن بعده اشتهيت اشوف فيلم
دخلت قوقل ابحث عن فيلم
الي هو هذا

^
^
حسيت انه حلو وودي اني اشوفه

<<<< تحسونها طفلة

بس والله افلام الانيمي حلوة خاصة حقات ديزني

المهم قعدت ابحث
يايطلع منتدى ويقول لازم اشترك عشان تطلع الروابط وانا مالي خلق اشترك
او يطلع رابط مايشتغل
او يحمل وبعد مايحمل مايشتغل الفيلم بجهازي

واثناء البحث دخلت اختي الصغير عمرها 9 سنين
وقالت ايش تسوين
قلت : ادور على فيلم
قالت اي فيلم
ووريتها صورته
اختي طارت عيونها وقعدت تضحك
وقالت ماتوقعت ان الفيلم يطلع كرتون
>>>> ياعالم انا تهزأت
تتخيلون الي عمرها 9 سنين حست انه شي مضحك اني ادور على هالفيلم
لا والي اضحك من كذا انها قعدت تقولي نزلي لي مسلسل عرس الدم

هي تدور على مسلسل وانا فالحة ادور على كرتون
بس مالي شغل الكرتون دخل راسي وابي اشوفه بس اني طفشت مالقيته ولا شفته

المهم
قعدت عالماسنجر اسولف مع العالم

لما جت الساعة 10 بالليل قررت اني اشوف فيلم بالتلفزيون وطبعا انا مو راعية تلفزيون ابدا ولا استمتع اذا جلست عند اتلفزيون
رحت التلفزيون ادور فيلم توه يبدا عشان اشوفه من اوله وافهم القصة زين
فتحت mbc2 لقيت في فيلم بادي من ساعة يعني ماينفع
رحت روتانا سينما لقيتهم يسوون مقابلات مع الفنانين عشان النيوييير
اخر شي فتحت the one حقت دبي ولقيت فيلم توه يبدا وقلت خلاص بشوفه
لقيت الفيلم ممل لابعد درجة
ومرة هاااااادي بزيادة بطريقة مملة
جلست نص ساعة اشوفه وبالاخير طفشت وسكرت التلفزيون وقلت مو لازم اشوف شي خلاص

رجعت للنت وفتحت قوقل قلت بنزل اي فيلم اي بطيخ اهم شي اضيع وقت
<<<< حطت براسها الا بتشوف فيلم

بس مالقيت شي زين

دخلت توتة الماسنجر وحسيت انها انقذتني وبتطلعني من الملل الي انا فيه قعدت اسولف معها شوي الين مادخت ورحت نمت

يعني يومي كان كله ملل × ملل
طفشتكم معي

وبس اشوفكم في يوميات ثانية
بس ان شاء الله تكون حلوة مو زي امس ملل × ملل

[لؤلؤة المحيط]

عدنا مع يوميات جديدة

اليوم الجمعة 4 يناير 2008

طبعا اليوم الجو خطيييييير وخياااااااال

اليوم قمت متأخر شوي بعد ماقمت افطرت مع امي

ودخلت المنتدى شوي وحست فيه

لما اذن العصر طلعنا البر

طبعا وناسة البر بهالجو الرهييييب


المهم

رحنا للبر انا وامي واخواتي مع صديقة امي
عائلة صديقة امي مكونة من صديقة امي وامها وبنتين <<< بنات صديقة امي

المهم

رحنا للبر معهم ووقفنا بمكان قريب من الشارع العام بس شوي بعيد عن الناس
وكان في جنبنا حوش بعارين <<<< جمال للي مايفهم

المهم انا لما وقفنا قلت اخاف ينطلقون علينا قالوا لا ان الحوش مسور وان شاء الله مايصير شي

انا رحت جنب الجمال بصورهم انا والبزران رحنا نصور


^
^
^
^
هذي صورة جماعية للجمال

المهم لاحظت ان في جمل قريب ويمديني ااصوره صورة لحاله وتكون حلوة

وبديت اصوره وهو يطالع فيني ويستعرض

وهذي صوره







صورت وخلصت بعدين انا والبزران رجعنا للمكان الي فارشين فيه اهلنا
ومادريت الا والجمل الي صورته لحقني واثاري السور له فتحه يمديهم يطلعون منها
شكله عشقني ولد الناس

المهم لحقني وواحد من اخوياه جا وراه <<< يعني صاروا جملين

انا وصلت عند اهلي وانا اركض واقول فيه جملين طلعوا
هم ماصدقوا
والبزران يقولون الا شوفوهم طلعوا ورانا
المهم يوم قربوا من عندهم صدقوا
وقعد الجمل الي صورته يقرب من عندنا ويشم الاكل الي احنا جايبنه ( عبارة عن قهوة وشاهي وتمر ومكسرات )
المهم احنا قمنا وبعدنا مابقى الا امي وصديقتها وام صديقة امي مسوين شجاعات ويحاولن يهشون الجمل وطبعا مو عارفين يتصرفون معاه
والجمل قرب من وجه ام صديقة امي وهي تبعد وهو لاصق بوجهها
وانا اختي والبزران نصرخ واختي الصغيرة تسب فيهم
كأنهم يفهمون

المهم بالاخير سواقنا انتبه
وجا يركض ومعاه عصا الجمل يوم شافوا السواق خافوا وهجوا

اووف واخيرا يعني يوم شافنا حريم ضعيفات ماخاف يوم جا السواق خاف وهج

المهم جينا ضفينا اغراضنا وركبنا السيارة
طبعا حنا طول مالجمل عندنا وحنا ودنا نركب السيارة ونضف الاغراض بس مو قادرين
مو معطينا مجال

المهم ركبنا السيارة الا وبنت صديقة امي تقول انها صورت الجمل وهو جنبنا <<< يافضيها

انا قلت لها ارسلي لي اياه بلوتوث ويجيني بلوتوث من 911 <<< كذا مسميه نفسها
وانا على بالي يااااااي اسمي بالبلوتوث دلع اسمي الحقيقي

استقبلت البلوتوث وهذي الصورة



المهم رحنا لمكان بعيد عن الجمال وفي ناس
فرشنا هناك وقعدنا نسولف سواليف حريم ونشرب شاهي وناكل فصفص

وباخر شي قررنا نقوم عشان تعرفون بكرا دوامات ومانقدر نتأخر خاصة ان معنا بزران ولازم ينامون بدري واحنا نضف الاغراض مطرت مطر خفيف
ياااااااااااااااااااااي ونااااااااااااسة

وركبنا السيارة وكل واحد راح بيته

والحين انا جالسة اكتب اليوميات

ومتحمسة مرة للدوام بكرا
بكرا الدوام بعد اجازة استمرت لمدة 3 اسابيع وراح يكون بمكان جديد ومعاي صديقاتي
بس في وحدة للاسف من الي معاي مااحبها الله يعيني عليها
افتكيت منها من بعد ايام الجامعة ماتوقعت اني اقابلها باثناء التدريب بس الله يعين

وبس
نلقاكم مع يوميات اخرى باذن الله