هذا الموضوع للبنات ليستفيدوا منه وخاصة وانهم اغلبوهم قربوا على
لكي يعرفوا كيف يلاقوا عرسان او تماسيح
الى كل سحليه ناشبة في حلق أهلها وماتصرفت اليك عصارة راسي وبنات أفكاري أضعها بين يديك
كيف تصطادين تمساح دون اللجوء للأساليب المعهودة والسقيمة
(المغازل ،الترقيم،التميلح اللي ماله سنع،الترزز بالاسواق .الخ )
اول شئ نقي تمساح زين اصلي رغم ( باحوا ) معاد فيه منهم هالايام
<<-- بقي هذا بس
وخلي امك تروح عند امه يعني زيارة حرايم
واتبع الخطوات التاليه في بيت الناس
1- خليك مع أمك لاتروحين مع البنات وتتهبلوا اصبري عنهن كم شهر لين تتم العملية
2-امشي وانتي حاطة راسك بين كتوفك لاترفعينه أبدا حتى لو يصير كله صعارير (خلي الفكس دائما في
متناول اليد ) علشان يقولون مؤدبة ومب متكبرة وكذلك عشان اذا فيه قمل لايطيح على الفراش وتخربي ابو الشغل كله
3- كلمة خالة خليها على لسانك وخاصة الأم التمساح علشان تحس بنوع من التميز عن بقية العجز .لامانع تنادين وحدة ثانية بخالة علشان إذا مانجحت الخطة مع العجوز نمبر ون تنجح مع الثانية اتبعيها كخطة احتياطية (يعني ستبنة )
4-إذا بدت أمك تتكلم انغزيها بكوعك علشان تدخلك بالموضوع حتى لو مالك داعي تطبيقا للمثل (كثر الطق يكسر الحديد) أدري إن المثل ماله داعي بس مالقيت غيره
5-اخوانك الصغار لاحقيهم وطامري وراهم وين مايروحون حتى لو مب عادتك بس تصرفي معهم كأنك أمهم لأن هذا يوحي بما لايدعو مجال للشك عند العجوز بأنك حريصة على ذريتك (جعلهم عقبك)
6-مهما أكلت أمك من أكلة زينة خليها تقول :نفس الاكله اللي تسويها بنتي (حتى لو الاكل من المطعم الصيني أو المكسيكي ) <<--- براد شاهي حتى ماتعرف تسويه
7-اذا جيتي بتمدين ايدك جعلها الكسر< (خربها) غيري ملامح خشتك وتويجعي (مب قوة علشان مايقولون البنت جرئية) وخلي أمك تقول :قايلة لك وأنا أمك لاتنظفين جدران الفلةالخارجية بس أنتي الله يهديك ذابحتك النظافة <<-- تنظفين جدار الفيلا هاااه وانتي وغرفتك الي يدخلها يقول فيها قنبلة ذريه ولا مكسور فيها ماصورة مجاري
8- دايم ارتزي كأنك بالعة قصبة علشان ماينقص من طولك ولا سنتيمتر (للقصيرات)
9-اذا تكلموا الحريم عن أي عرس اكتمي نفسك لين تحمر خدودك علشان يقولون البنت تستحي ومالنا حق تكلمنا عندها (بس لاتكتمين نفسك مرة أخاف تروحين فيها وأصير قتلت نفس بغير حق <<- الله يستر وبس
10- مهما كان موضوع الحوار حماسي لاتبدين رأيك وخليك مثل الطرما لأن اللقافة تخرب ام الشغله كلها
11- شعرك افرديه لين يتحسحس لاتخلينه طاير وشوشة مهما كانت الموضة لأن العجز مايدورون الا اللي شعورهن ناعمة والا ياعمري اللي شوشهن طايره ماحد يلتفت يمهن <<-- واذا خربتيها وسويتي فرنسي ولا قصة حمد المنتشري الله لايهينك اشتري باروكه
(حمد المنتشري <<-- احلى لاعب بالاتحاد )
12- إذا أدلت العجوز (أم المتوهق) بأي رأي سواء كان سياسي أو وطني أو اقتصادي وافقي عليه حتى لو هو ماسخ وماله داعي مثلا تقول العجوز:أمس بوش متقهوي عندنا قولي لها :وليه ماعلمتينا ياخاله نجي نعاونكم
13- في العروس لاترقصين اربضي واقضبي ارضك واعتبري الرقص عيب وشق جيب
14- اذا جا طاري السوق وطبعا هو لازم يجي الطاري لأنه ملح الجلسة عند الحريم خلي أمك (الله يعظم أجرها ) تقول بناتي مايطلعون للسوق أغراضهم أبوهن يجيبها (وانتي شكلك مقطعه السوق تقطيع )
**احتمال وارد الحدوث
ممكن تكون العجوز منشنة على بنت غيرك لكن بعد النقاط السابق ذكرها بتصرف نظر عنك وعنها << -- امزح لاتصدقي هههههههه
الحين بتكون العجوز وقعت بالفخ
نروح للتمساح <<-- الضحيه
اهجدي في بيت أهلك ولاعاد تطلعين واذا جاء المعرس بيشوفك خلي أبوك يقول له :والله ودي تشوف البنت بدون ماتدري علشان تأخذ راحتك وانا عمك وبعدين تشوفها على الطبيعة علشان ماتقول بعدين غشيتوني (ايه هين ياالشايب لو يحصل حطيت بدالها باسكال مشعلاني والا أليسا والا مايا مطيرين عقول التماسيح )
وقبل يجي اليوم اللي بيشوفك فيه بحوالي اسبوع أو أكثر (على حسب شين وجهك ) ادهري من مشغل لمشغل (صبغه ،فرد،تنظيف بشره،الخ) لاتخلين على خشتك قاصر
ولما يجي المعرس خلي أخوك ياقف بجنبه عند الشباك علشان مايطول بالتبحلق ويبان المستخبي وذلك تطبيق لنظرية اللمحة ذبحة
وطريقة وش تسوين لما يكلمك هذا ماراح اعلمك عليها عشان تتوهقي <<- اهم نقطه
<<-- موب نذل
بس خلي أبوك في نهاية المشاهدة يقول:العذر والسموحه وأنا عمك (الشايب ضمن الولد يوم انه يقول وأنا عمك ) ترا (البنت شينه اقصد حلوه)مع انها طاقه كل انواع الزينة بس يعني اني في هاللحظة الولد بينط على راس أبوك وبيمطخه لين يشفط مخه وبيقول متى العرس ياعم (اللهم ارحمه فقد كان ولدا بار بوالديه )
تحذير صحي /
ابعدي عن أمهات العيال اللي متعلمات راعيات الشنطة مثل لون الجزمة لأن هذولي يبيلهم خطط بعيدة المدى
نصيحه /
خوياتك بيلاحظون التغيرات المفاجئة اللي صارت لك فانتي قولي لهم :انك خلاص صرتي عاقلة ومؤدبه ومن هالكلام <<-- والله بتجيب العيد في نفسها
واتمنى لكم كلكم بعد هذا الخطه التوفيق والحياة الزوجيه السعيده
واذا في مشاكل او شئ راجعوا المغنواتي
هذا الموضوع للبنات ليستفيدوا منه وخاصة وانهم اغلبوهم قربوا على
العرض العادي
