انا رايي ما راح يطلع بعيد عن راي اخواني
في كذا حل منهم
ممكن زي ما تفضلوا دورات .. او شهادات دبلوم اللي تنأخذ في سنه مثل مراكز نيوهورايزن او غيرها
منها تسلين نفسك ومنها تكون عندك شهادات معترف بها

او ممكن تشغلين نفسك في اشغال يدويه بالبيت وعلشان تشجعين نفسك بيعيها او افتحي مشروع صغير وبسيط
زي طلبات الاكل مثلا او الحلى

في فكره ببالي صارلها زمان
ممكن تشغلين وقتك بانك تجهزين لكتاب وتطبعينه ويتوزع
واعتقد راح تكون دافع لك انك تسوين كتاب و2 و3 .. بس المهم يكون كتاب فيه حاجه تشد العالم واشياء تحبها الناس

وبرضو ممكن تفكرين في مشروع بيبي صغيرون يملى عليك حياتك
من اللي اشوفه من خواتي بالبيت ان اليهال ياخذون من وقتهم شي مو قليل
يعني على ما تخلصين منه قد يكون زوجك رجع من الدوام

واهم من هذا كله ... افتحي الموضوع مع زوجك وشوفي هو شيقولك؟
مو يمكن هو عنده حل احسن من هذا كله

اما بالنسبه لاقتراح انك تشتغلين هذي انا ما أأيدها لاني احس المره اذا اشتغلت تنشغل عن بيتها وزوجها
راح تقولين دورات برضو راح اطلع عن البيت ومن هالكلام
بس الدورات راح تكون بالكثير ثلاث ساعات؟؟ يعني راح ترجعين قبل لا يرجع زوجك

وقبل لا انسى
ما قلتي انتي وين ساكنه؟؟ ترى برضو يأثر... يعني المجتمع والبلد يأثر في الاقتراحات
يعني مثلا لو انك قطريه على سبيل المثال... كان ممكن الواحد يعطيك اسماء اماكن او معاهد او .... بالضبط وانتي تشوفين الاحسن :)

اتمنى لك التوفيق بحياتك خيتو.. ولاتترددين بطلب اي مساعده
حنا هنا خواتك واخوانك :)

اختك
شارمنق